Wagtlaýyn sergiler zaly

Mary welaýatynyň taryhy we ülkäni öwreniş muzeýiniň wagtlaýyn sergi zalynda 2025-nji “Halkara parahatçylyk we ynanyşmak ýyly” şygary astynda başlanan ýyla bagyşlanan sergi gurnaldy. Parahatçylyk we ynanyşmak adamzadyň abadan geljegini üpjün etmek üçin biri-biri bilen aýrylmaz baglanşykly iň gymmatly düşünjeler bolup, ol häzirki wagtda halklaryň arasynda hyzmatdaşlygyň hem-de ösüşiň baş ýörelgeleriniň biridir. Şu günki gün, Arkadagly Gahryman Serdarly Watanmyzda parahatçylyk döwletimiziň baş ugry bolmak bilen dünýä döwletlerine nusgalykdyr. Garaşsyz, hemişelik Bitarap döwletimizde dünýä ýurtlary bilen parahatçylyksöýüjilik, hoşniýetli, dostlukly, syýasy, ykdysady, medeni gatnaşyklar halklaryň arasyndaky abadançylygy üpjün etmäge mynasyp goşantdyr. Türkmenistan Ata Watanymyz - gadymy siwilizasiýalaryň dörän, özüniň taryhy ösüşinde bagtyýarlyk zamanasyny başdan geçirýän, arheologik we tebigy ýadygärliklere baý döwlet bolmak bilen parahatçylygyň dabaralanýan, dost-doganlygy berkeýän ýurdydyr. Ýurdumyzyň çäginde ençeme müňýyllyklary özünde jemleýän arheologiýa ýadygärlikleri bolan gadymy oturymly toplumlardan tapylan tapyndylar we ata-balarmyzyň edim-gylym, däp-dessuryna eýerip döredilen milli gymmatlyklarymyz bu gün muzeýleriň bahasyna ýetip bolmajak baýlygydyr.Bu hem türkmen halkynyň örän baý medeni mirasyny şöhlelendirýär. Beýik ýüpek ýolunyň çatrygynda ýerleşmek bilen gadymy hem özboluşly medeniýetiň mekanydyr. Asyrlaryň dowamynda gündogar we günbataryň gadymy merkezleri bilen ýakyn aragatnaşykda bolup bu ýakyn gatnaşyklar bolsa bu günki gün hem dowam edýär. Türkmen asyrlar boýy milli gymmatlyklaryny aýap saklap, ony geljekki nesillerine miras galdyran millet gadymylygyna hem milli aýratynlyklaryna sarpa goýan halkdygyny, ata-babalarynyň asylly däp-dessurlaryna esaslanyp arşa göterýär.