Türkmenistanyň Döwlet Energetika institutynda Gurban baýramy mynasybetli aýdym-sazly çäre geçirildi. Bu çärede Mary welaýatynyň taryhy we ülkäni öwreniş muzeýiniň ylmy işgärleri tarapyndan haly önümlerinden, saý-seplerden, bedew ata degişli esbaplardan sergi gurnaldy. Bu çärede milli tagamlar taýýarlanylyp, milli aýdym-sazlar hem belentden ýaňlandy. Ata-baba däp-dessur bolup gelýän bu baýram halallygyň, päkligiň, agzybirligiň baýramydyr.Gurban baýramyny geçirmegiň gadymyýetden gelýän öz kada-kanuny bar. Adamlaryň säher bilen goňşy-golamlara , dost-ýarlara salama barmagy, raýatlaryň birek-birege mähribanlygy öňden gelýän sazlaşygyň dowamydyr. Çünki ten we ruhy taýdan tämizlenen adamlar şol gün öýke-kinäni, bir mahalky nägileligi ýatdan çykarmalydyr. Munuň özi Gurban baýramynyň ruhy äleme edýän sogaply hemaýatydyr. Gurban baýramy-gözelligiň hem-de haýyr-sahabatyň baýramy. Ene-mamalarymyz Gurban baýramynda täze egin-eşikleri geýmekligi däp-dessur edinipdirler. Bu baýramda adamlar al-ýaşyl geýnişip, ýaşaýşa baky minnetdarlyk bilen kalp tämizligini hem döredipdirler. Ýaşlar hiňňilliklerde uçupdyrlar. Gurban baýramy her bir türkmen üçin mukaddesdir. Baş sadakalar berlip, aýat-töwirler edilýär. Agzybirligiň, jebisligiň baýramy bolan bu baýramda bir supradan tagam iýlip, şadyýanlyk, şowhun, dabara bilen il-ulusymyz jem balýar. Gurban baýramy her ýyl ýurdumyzda döwlet derejesinde ählihalk baýramy hökmünde şatlyk-şagalaňda bellenilip geçilýär. Özem agzybir, asuda ilimiz şol üç güni dynç alyp, arkaýyn baýram edýär. Gurban baýramynda adamlaryň köňülleri täzelenýär.