Mary welaýatynyň taryhy we ülkäni öwreniş muzeýinde her hepdäniň ahyrynda ylmy işgärleriň ylmy-geňeşi geçirilýär. Geňesiň dowamynda ylmy işgärleriň iş saparlaryna gidip toplan eksponatlary görkezilýär, şeýle-de ylmy temalar diňlenilýär. Geňeşde ýygnalan eksponatlara seredilýär, haýsy gazna degişlidigi seljerilýär.Geçirilen geňeşde Mary şäheriniň Muhadow ýaşaýyş jaý toplumynyň ýaşaýjysy Hanowa Oguljennediň muzeýimize sowgat beren rus semowary görkezildi. Bu semowar çaý gaýnatmak üçin niýetlenendir. Semowaryň içine üç litre golaý suw sygypdyr. Biziň ählimiziň uly höwes bilen içýän gök çaýymyz diňe bir öz tagamy bilen bize lezzet bermek bile çäklenmeýär. Çaý teşneligiňi gandyrýar, ýadawlygyňy aýyrýar, derdiňe derman bolýar, jana şypa berýär. Halk arasynda çaý bilen bagly yrymlar gaty köpdür. Şeýle yrymlaryň köp bolmagy çaýyň halkymyzyň durmuşynda nähili ähmiýetiniň bardygyny görkezýär. Çaýyň soňuny iň eziz dostuňa, joraňa bermek gowy görülýär. Şonuň üçin bolsa gerek, “Çaýyň soňy dostuňky” diýen nakyl ýörgünli. Halkdan toplanan bu gymmatlyklar biziň muzeý gaznamyza uly goşant bolýar. Şeýle-de bu gymmatlyklar biziň ýaş nesillerimize milli mirasymyzy öwrenmäge uly ýardam berýär. Muzeý gymmatlyklary uly terbiýeçilik ähmiýete eýe bolup, ýaşlarda taryhy geçmişimize, Watanymyza bolan buýsanç duýgusyny kemala getirýär.