Mary welaýatynyň taryhy we ülkäni öwreniş muzeýinde ussat gobelençi suratkeş Wiktor Kozlowyň ajýyp gobelen eserleri bar. Bereketli türkmen topragynda ýaşan ussat suratkeşiň dürli ýyllarda döreden gobelen eserleri milligi bilen ünsüňi özüne çekýär. Munuň özi onuň güneşe baý ýurdumyzy çäksiz söýenligi hem-de milli däp-dessurlarymyzdan düýpli baş çykaranlygynyň aýdyň subutnamasydyr. Suratkeşiň ajaýyp eserleriniň biride “Garramaýan dutar” atly gobelen eseridir. Bu eser Muzýimiziň etnografiýa zalynda ýerleşdirilen. Suratkeş bu eserinde güberçek haly usuly bilen gobeleni utgaşdyrmak arkaly ajaýyp eser döretmegi başarypdyr. Tekiz gobeleniň ýüzünde eli dutarly ýaşulynyň keşbi hala çitilipdir. Sazandanyň arka tarapynda ajaýyp tebigat şekillendirilipdir. Bu nepis eser ynsan bilen tebigatyň arasyndaky göze görünmeýän sazlaşygy, ynsan garrasa-da, dutar saz guralynyň bakylygyny tomaşaça täsirli ýetirýär. Ondan başgada muzeýimiziň gaznasynda ussat suratkeşiň birnäçe işleri bar. “Gündiz”,”Ikindi”,”Gije”, ýaly gobelen eserlerinde güneşiň tylla nuruny, kuýaşyň ýaşyp barýan täsin pursatyny suratlandyrýar. “Gije” atly eserinde tüm garaňkyda nurana Aýyň, ýyldyzlaryň şöhlesini ýiti duýmak bolýar. Bu eserler gobelençi suratkeşiň synçylygyndan habar berýär. “Galkynyş” atly eseri onuň uly göwrümli döwrebap işleriniň biridir. Ajaýyp zamanamyzda gurulýan binalary suratlandyrýan eser häzirki zaman binagärçilik sungatynyň ýeten belent sepgitlerini özünde jemleýär. Eserde suratkeş ýaşyl, mele, gök, çal we beýleki reňkleri ulanypdyr. W.Kozlowyň “Demirgazyk Köpetdagyň gerişleri” atly esseri-de türkmen tebigatynyň ajaýyp görnüşlerine bagyşlanýar. Ol bu eserinde Köpetdagyň al–ýaşyl öwüsýän gerişlerini, gök asman bilen keremli dagyň özboluşly sazlaşygyny inçelik bilen görkezmegi başarýar. Biz goblençi suratkeş Wiktor Kozlowyň şeýle ajaýyp eserlerini muzeýimizde gurulýan wagytlaýyn we hemişelik sergilerde görkezilýar. Sergä gelýän myhamanlar bu goblen eserleri bilen gyzyklanyp, ylmy işgärler bilen sorag-jogap alyşýarlar.