Mary welaýat taryhy we ülkäni öwreniş muzeýiniň etnografýa zalynda erkek adamlaryň geýen aýakgaplary bolan çokaýdyr, çarygy, mesini görmek bolýar. Gadymy döwürlerde ulanylan halkymyzyň milli senetleriniň biri çokaýdyr, uzak ýyllaryň dowamynda biziň ata-babalarymyz aýakgaplary geýip gezipdirler. ÇOKAÝ. Çokaý türkmen halkynyň ir döwürden bäri geýip gelýän aýak gaplarynyň biridir. Ol hünärmen ussalar tarapyndan tikilip, erkek adamlar üçin niýetlenen aýakgapdyr. Çokaý gurak sowukda, ýer bilen iş salyşýan daýhanlar, maldarlar üçin elýetmez aýakgaplaryň biri. Ol ýüňden dokalan dolak bilen geýilýär. Çokaýy geýen çopanlara ürgen çägede ol hasam rahat bolupdyr. Çokaý tikilýän gönleri iri şahly mallaryň (öküziň, sygryň, göläniň) derisinden eýlenip taýýarlanýar. Sentýabr aýyndan tä mart aýyna çenli soýulan mallaryň derisinden taýýarlanan gön has tapawutly, gowy hasaplanýar. Geçmişde çokaýyň her welaýatda tikilişi biri-birinden has tapawutly bolupdyr. Çokaýyň başga aýakgaplara garaňda üýtgeşikligi, tapawudy bardyr. Çokaý tikilende ýelim, boýag ulanylmaýar we işliklenmeýär. Çokaý köp böleklerden ybarat bolup, diňe gaty gönlerden tikilse-de örän ýeňil bolýar. Çokaý gurak sowuk aýazly, jöwzaly yssyda salkyn bolup, ýylyň bütin dowamynda geýmäge ýaramlydyr.