Gyzylgaz örän owadan guş. Onuň aýaklary hem boýny uzyn bolýar. Daşky görnüşi bolsa gülgün reňklidir. Seýrek gabat gelýän bu uly guşa esasan şor suwly sähra köllerinde, Hazar deňiziniň etekleri, Garabogaz aýlagy, Çeleken töwereklerinde, Balkan goraghanalarynda gabat gelmek bolýar. Olar deňizdir derýalaryň , kölleriň suw howdanlarynyň kenarlaryndaky ýalpak suwly ýerlerinde süri-süri bolup, hatara düzülşip, uzyn günläp iýmitlenýärler, gezim edýärler. Şu halat olary golaýdan synlasaň, edil gülälekli meýdany ýadyňa salýar. Oňat uçup, oňat ýüzüp bilýän gyzylgaz köplenç suw otlarydyr suw jandaryny iýip oňýarlar. Olar asmanda toýnuk gurap uçýarlar. Arasyndan haýsydyr biri kerweniň öňüni çekýär. Muňa onuň serdary ýa-da kerwenbaşysy diýilýär. Bu guşlar suwyň ýalpak hem gamyşly ýerlerinde, çöp-çalamlaryň üstünde gyrmançadan, ösümliklerden, mollýuskalaryň boşan daşky örtüklerinden uly höwürtge ýasanýar. Olaryň her sürüsinde üç ýüze ýakyn höwürtge bolýar. Şol höwürtgelerde gyzylgazlaryň mäkiýanlary bir - iki sany ýumurtgasynyň üstünde maýdyr- iýun aýlarynda oturyp, 30-32 günüň dowamynda jüýje çykarýarlar. Jüýjeleriň ýasy we çowsuz ganatlarynyň reňki birbada garamtyl çalsow bolup, üstünden biriki ýyl geçenden soň uly gazlaryňky ýaly, gülgün öwsüp ugraýar. Bu guşlary awlamak gadagan.